တောင်အာဖရိက နိုင်ငံမှာ ကျင်းပမယ့် ၂၀၁၀ ကမ္ဘာ့ဖလား ပြိုင်ပွဲကြီး စတင်ဖို့ သုံးလလောက်သာ လိုပါတော့တယ်။ ဒီကာလ အတွင်းမှာ ကမ္ဘာ့ဖလား ၀င်ခွင့်ရတဲ့ နိုင်ငံတွေ ထဲက လက်ရွေးစင် ဖြစ်ခွင့် မရနိုင်တဲ့ အကောင်းဆုံး ကစားသမား (၁၀)ဦးကို Goal.com ရဲ့ ဆောင်းပါးရှင် ကာလို ဂါဂန်နိစ်က ရွေးချယ် ဖော်ပြခဲ့ပါတယ်။ အခု ဖော်ပြထားတဲ့ ကစားသမား အားလုံးဟာ ကမ္ဘာ့ဖလား ခြေစစ်ပွဲ အောင်မြင်ထားတဲ့ နိုင်ငံတွေက ကစားသမား တွေချည်း ဖြစ်ပါတယ်။
(၁၀) ပီပီ (ပေါ်တူဂီ)
နာမည်ကျော် ရီးယဲယ်အသင်းရဲ့ အဓိက နောက်ခံလူ တစ်ဦးဖြစ်ပြီး လိုအပ်ရင် ကွင်းလယ် အဖျက် ကစားသမား အဖြစ်ပါ ကစားနိုင်တဲ့ ပီပီဟာ ကမ္ဘာ့ ဖလား ပြိုင်ပွဲဝင် ပေါ်တူဂီ အသင်းရဲ့ ခံစစ်ကို ဦးဆောင်မယ့် သူလို့ ပရိသတ် တွေက မျှော်လင့် ခဲ့ကြပါတယ်။ ဒါပေမယ့် ပြီးခဲ့တဲ့ ဒီဇင်ဘာလ အတွင်းမှာ ကစားခဲ့တဲ့ ဗလင်စီယာနဲ့ ပြည်တွင်းလိဂ် ပွဲစဉ်မှာ ညာဘက် ဒူးအရွတ် စုတ်ပြဲတဲ့ ဒဏ်ရာ ပြင်းပြင်းထန်ထန် ရခဲ့ပါတယ်။ ဘရာဇီးလ် နွယ်ဖွား ကစားသမား ပီပီရဲ့ အဲဒီ ဒဏ်ရာဟာ အနည်းဆုံး ၆ လလောက် အနားယူ ရတော့မှာ ဖြစ်လို့ ကမ္ဘာ့ဖလား ပြိုင်ပွဲနဲ့ လွဲချော်ဖို့ သေချာ သွားခဲ့ ပါတယ်။
(၉) ရာအူးလ် (စပိန်)
စပိန် လက်ရွေးစင် အသင်းမှာ ပွဲပေါင်း ၁၀၂ ပွဲ ကစားပြီး ဂိုးပေါင်း ၄၄ ဂိုး သွင်းထားတဲ့ ရာအူးလ်ဟာ သူ့ရဲ့ရှေ့က လက်ရွေးစင် ကစားသမား ကြီးတွေရဲ့ စံချိန်တွေ အားလုံးကို ချိုးဖျက် နိုင်ခဲ့သူပါ။ ဒါပေမယ့် သူဟာ အခုအချိန်ထိ ကမ္ဘာ့ဖလား မှာရော၊ ဥရောပ ဖလား မှာပါ အောင်မြင်မှု ကြီးကြီးမားမား မရခဲ့သေး ပါဘူး။ ပြီးခဲ့တဲ့ ယူရို ၂၀၀၈ တုန်းက စပိန်အသင်း ဥရောပ ချန်ပီယံ ဖြစ်ခဲ့တယ် ဆိုပေမယ့် ရာအူးလ်ဟာ အဲဒီ လက်ရွေးစင် အသင်း အတွက် ရွေးချယ်ခြင်း မခံခဲ့ရပါဘူး။ အသက် ၃၂ နှစ် ရှိပြီဖြစ်တဲ့ ရာအူးလ်ဟာ ပြီးခဲ့တဲ့ ၂၀၀၆ စက်တင်ဘာ နောက်ပိုင်း ကတည်းက လက်ရွေးစင် အသင်း အတွက် ရွေးချယ်ခြင်း မခံရတော့ တာပါ။ လက်ရှိမှာလည်း သူနဲ့ ဆက်ဆံရေး အဆင်မပြေတဲ့ နည်းပြကြီး ဒဲလ်ဘော့စကေး ကိုင်တွယ်နေတဲ့ စပိန် အသင်းမှာ ဖာနန်ဒို တောရက်စ်နဲ့ ဒေးဗစ် ဗီလာ တို့လို ဒေါင်ဒေါင်မြည် တိုက်စစ်မှူးတွေ ရှိနေလို့ ရာအူးလ်ရဲ့ ကမ္ဘာ့ဖလား အိမ်မက်ဟာ မှုံဝါး သွားခဲ့ပါပြီ။
(၈) ဆီဘက်စတီယန် ဖရေး (ပြင်သစ်)
ပြင်သစ် ဂိုးသမား ဖရေးဟာ အီတလီ စီးရီးအေက အကောင်းဆုံး ဂိုးသမား (၃)ဦး စာရင်းထဲ ပါဝင်နေတယ် ဆိုတာ ဘယ်သူမှ ငြင်းမရပါဘူး။ တခါတရံမှာ အကောင်းဆုံး ပုံစံ ရနေချိန်မှာ နာမည်ကျော် အီတလီ လက်ရွေးစင် ဂိုးသမား ဘူဖွန်နဲ့ အင်တာ မီလန်က ဂျူလီယို ဆီဇာတို့ ထက်တောင် ကောင်းတယ်လို့ တစ်ချို့က ဆိုပါတယ်။ ဒါပေမယ့်လည်း သူ့ကို ပြင်သစ် လက်ရွေးစင် အသင်း နည်းပြကြီး ရေမွန် ဒေါမနစ်က မသိကျိုးကျွံ ပြုနေတာကြောင့် ပြီးခဲ့တဲ့ ၂၀၀၈ သြဂုတ်မှာ လက်ရွေးစင် အသင်းက အနားယူပြီလို့ ဒီ ၂၉ နှစ်သား ဂိုးသမားကြီးက စိတ်နာနာနဲ့ တရားဝင် ကြေညာခဲ့ပါတယ်။
(၇) အက်ရ်ှလေကိုး (အင်္ဂလန်)
ကမ္ဘာ့ အကောင်းဆုံး ဘယ်နောက်ခံလူ တွေထဲမှာ တစ်ဦး အပါအ၀င် ဖြစ်တဲ့ အက်ရ်ှလေကိုး အတွက် ကမ္ဘာ့ဖလား ပြိုင်ပွဲအမှီ ကြံ့ခိုင်မှု ပြန်လည် ပြည့်ဝဖို့ ဆိုတာ နီးမလိုလိုနဲ့ ဝေးလွန်းလှ ပါတယ်။ အသက် ၂၉ နှစ် အရွယ်ရှိ ကွင်းလယ် ကစားသမား အက်ရ်ှလေကိုးဟာ ပြီးခဲ့တဲ့ ဖေဖော်ဝါရီ ၁၀ ရက်နေ့က ခြေကျင်းဝတ် ဒဏ်ရာ ရရှိသွား တာကြောင့် အနည်းဆုံး ၃ လ လောက် နားရမှာ ဖြစ်ပါတယ်။ တကယ်လို့ ကမ္ဘာ့ဖလား ပြိုင်ပွဲအမှီ ဒဏ်ရာကနေ ပြန်ကောင်းလာတယ် ဆိုရင်တောင် ပုံမှန်ခြေစွမ်း ပြန်ရဖို့ အတွက် ကြိုးစားရဦး မှာမို့ သူလည်း ကမ္ဘာ့ဖလား ပြိုင်ပွဲ လွဲချော်မယ့် သူတွေ စာရင်းမှာ ပါဝင်လာတာ ဖြစ်ပါတယ်။
(၆) အန်တိုနီယို ကာဆာနို (အီတလီ)
ကာဆာနိုဟာ သူတို့မျိုးဆက် အတန်းမှာ အရည်အချင်းတွေ အဖြုန်းတီ ပစ်ဆုံး ကစားသမားလို့ သတ်မှတ်ခံထား ရသူ တစ်ယောက် ဖြစ်ပါတယ်။ ခြေစွမ်း အရမ်းကောင်း ခဲ့တဲ့ ကာဆာနိုဟာ ပြီးခဲ့တဲ့ ၂၀၀၃ ခုနှစ်ကနေ အခုအချိန် အထိ လက်ရွေးစင် အဖြစ်နဲ့ နိုင်ငံတကာ ပွဲပေါင်း ၁၅ ပွဲသာ ကစားရပါ သေးတယ်။ အသက် ၂၇ နှစ် အရွယ်ရှိပြီ ဖြစ်တဲ့ ကာဆာနိုဟာ သူ့ရဲ့ စိတ်လိုက်မာန်ပါ အပြုအမူ တွေကြောင့် နည်းပြတွေနဲ့ ပြဿနာ ဖြစ်ခဲ့တာ အကြိမ်ကြိမ် ပါပဲ။ ပြီးခဲ့တဲ့ ယူရို ၂၀၀၈ ပြိုင်ပွဲအပြီး အီတလီ အသင်းကို မာဆယ်လို လစ်ပီ ပြန်လည် ကိုင်တွယ်တဲ့ နောက်ပိုင်း ကာဆာနိုဟာ တစ်ကြိမ် တစ်ခါမှ လက်ရွေးစင် အရွေး မခံရ တော့ပါဘူး။ သူ့ရဲ့ ကလပ်အသင်း ဆမ်ဒိုးရီးယားမှာ ခြေစွမ်း ပြနေပေမယ့် ကာဆာနို အတွက် ကမ္ဘာ့ဖလား ဆိုတာ အခု အချိန်မှာ အိမ်မက် တစ်ခုတောင် ဖြစ်နေပါတယ်။
(၅) ကလဲယားရင့် ဆီးဒေါ့ဖ် (ဟော်လန်)
ချန်ပီယံလိဂ် ဆုဖလားကို မတူညီတဲ့ အသင်း ၃ သင်းနဲ့ ၃ ကြိမ် ဆွတ်ခူးခဲ့ဖူးသူ ဆီးဒေ့ါဖ်ဟာ အသက် ၃၃ နှစ်သာ ရှိသေးပေမယ့် လက်ရွေးစင် အသင်းမှာ ပါဝင်ဖို့ အခွင့်အလမ်း တော်တော် နည်းနေ ပါတယ်။ ဟော်လန် အသင်းအတွက် ပွဲပေါင်း ၈၀ ကျော် ကစားပေး ထားတဲ့ ဆီးဒေါ့ဖ်ဟာ အဓိက ပြိုင်ပွဲကြီးတွေ မှာတော့ ပါဝင်ခွင့် ဆုံးရှုံးနေတာ တွေ့ရတယ်။ သူဟာ ယူရို ၂၀၀၈ ပြိုင်ပွဲမှာ ဟော်လန် အသင်းအတွက် ကစားပေးဖို့ ငြင်းဆန်ခဲ့တဲ့ ၂၀၀၈ မေလ နောက်ပိုင်းမှာ လက်ရွေးစင် အသင်းကို ယောင်လို့တောင် မရောက်ခဲ့တော့ ပါဘူး။ လက်ရှိမှာလည်း သူနဲ့ လက်ရွေးစင် အသင်းဆိုတာ မီးနဲ့ရေလို တစ်လမ်းစီ ဖြစ်နေပါတယ်။
(၄) ဟွမ် ရိုမန် ရီကွယ်လ်မီ (အာဂျင်တီးနား)
အာဂျင်တီးနား လက်ရွေးစင် အသင်းဟာ ပြီးခဲ့တဲ့ ကမ္ဘာ့ဖလား ခြေစစ်ပွဲမှာ ခက်ခက်ခဲခဲ ရုန်းကန်ခဲ့ရပြီး ပြိုင်ဘက်တွေကို အသာစီး မရခဲ့ဘဲ ကံကောင်း ထောက်မလို့သာ ခြေစစ်ပွဲ အောင်ခဲ့တာ ဖြစ်ပါတယ်။ ဒါဟာ ရီကွယ်လ်မီ မပါလို့ ဆိုပြီးတော့ ပရိသတ်တွေက တညီတညွတ်တည်း မှတ်ချက်ပေးနေ ပါတယ်။ ခေါင်းမာလှတဲ့ နည်းပြ မာရာဒိုနာဟာ ရီကွယ်လ်မီကို လက်ရွေးစင် အသင်း အတွက် ပြန်လည် ရွေးချယ်ဖို့ တူးတူးခါးခါး ဖြစ်နေသလို ရီကွယ်လ်မီ ကိုယ်တိုင်ကလည်း လက်ရွေးစင် အသင်းကနေ ကိုယ့်သဘောနဲ့ကိုယ် နှုတ်ထွက်သွား ခဲ့တာ ဖြစ်ပါတယ်။ သူတို့ နှစ်ယောက် ကြားက အဓိက ပြဿနာ စတာကက ဘိုကာ ဂျူနီယာ ပရိသတ်တွေဟာ ရီကွယ်လ်မီကို သူတို့ရဲ့ စံပြပုဂ္ဂိုလ် ဆိုပြီး နာမည်တပ်ခဲ့ ကြပေမယ့် မာရာဒိုနာ ကိုတော့ သစ္စာဖောက်လို့ စွပ်စွဲတာပါပဲ။
(၃) ရော်နယ်ဒို (ဘရာဇီးလ်)
ဘရာဇီးလ် နည်းပြ ဒွန်ဂါဟာ ရော်နယ်ဒို အတွက် အချိန်မရွေး တံခါးဖွင့်ထား ဆဲပါလို့ တတွင်တွင် ဆိုနေပေမယ့် ကမ္ဘာ့ဖလား ခြေစစ်ပွဲတွေ မှာရော၊ တိုက်ကြီးများ ဖလား ပြိုင်ပွဲမှာပါ လက်ရွေးစင် အသင်း အတွက် ရော်နယ်ဒိုကို မရွေးချယ် ခဲ့ပါဘူး။ ကမ္ဘာ့ အကောင်းဆုံး ကစားသမား ဖြစ်ခဲ့ဖူးသူ ရော်နယ်ဒိုဟာ လတ်တလောမှာ ဒဏ်ရာ ပြဿနာ တွေက ပြန်ကောင်းလာပြီး ဘရာဇီးလ် ထိပ်သီး ကလပ် ကိုရင်သီယန်မှာ ခြေစွမ်း ပြနေပါတယ်။ ဒါပေမယ့်လည်း ရော်နယ်ဒို အနေနဲ့ ဒွန်ဂါရဲ့ ဘရာဇီးလ် လက်ရွေးစင် အသင်းက နေရာ တစ်နေရာကို ရယူဖို့ ဆိုရင် ကိုပါ လီဘာတေးဒိုး ပြိုင်ပွဲမှာ ခြေစွမ်းပြနိုင်မှပဲ ဖြစ်နိုင် ပါတော့မယ်။
(၂) အလက်ဇန္နရို နက်စတာ (အီတလီ)
ကမ္ဘာ့အကောင်းဆုံး နောက်ခံလူ တစ်ဦးဖြစ်တဲ့ နက်စတာဟာ ပြီးခဲ့တဲ့ ၂၀၀၆ ကမ္ဘာ့ ဖလားမှာ အီတလီ အသင်း အောင်မြင်မှု ရခဲ့ပြီးတဲ့ နောက်ပိုင်း လက်ရွေးစင် အသင်းကနေ အနားယူ သွားခဲ့ ပါတယ်။ ဘာကြောင့်လဲ ဆိုတော့ သူ့ရဲ့ ခန္ဓာကိုယ်ဟာ လက်ရွေးစင် အသင်း အတွက်ရော၊ ကလပ်အသင်း အတွက်ပါ နှစ်ခုလုံး မပေးဆပ် နိုင်လို့ ဆိုပြီး နက်စတာက ဆိုခဲ့ပါတယ်။ ဒါပေမယ့် ပြီးခဲ့တဲ့ ၂၀၀၈/၀၉ ဘောလုံးရာသီမှာ ထူးထူးခြားခြား ခြေစွမ်းပြနိုင် ခဲ့တဲ့ နက်စတာဟာ လက်ရွေးစင် အသင်းအတွက် ပြန်ပါမယ်လို့ တီးတိုးတီးတိုး အသံ လေးတွေ ညံလာပါတယ်။ အသက် ၃၃ နှစ် အရွယ်ရှိပြီ ဖြစ်တဲ့ နက်စတာဟာ လက်ရွေးစင် အသင်းအတွက် စိတ်ပြန်လည်လာပြီ ဖြစ်ပေမယ့် နည်းပြ မာဆယ်လို လစ်ပီ ကတော့ မနေ့ကပဲ နက်စတာကို ပြန်ရွေးချယ်ဖို့ ငြင်းဆို လိုက်ပါတယ်။
(၁) ရော်နယ်ဒင်ဟို (ဘရာဇီးလ်)
ကမ္ဘာ့ အကောင်းဆုံး ကစားသမား ၂ ကြိမ်ဖြစ်ဖူးတဲ့ ရော်နယ်ဒင်ဟိုဟာ ဒီရာသီမှာ အသစ်တဖန် ပြန်လည် မွေးဖွား လာတယ်လို့ ဆိုနိုင်ပါတယ်။ စီးရီးအေမှာ အေစီမီလန် အသင်းနဲ့အတူ စွမ်းရည် ပြနေတဲ့ ရော်နယ်ဒင်ဟိုဟာ ဒီရာသီမှာ သွင်းဂိုး ၁၂ ဂိုး ရှိပြီ ဖြစ်ပြီး စီးရီးအေရဲ့ ဂိုးဖန်တီးမှု အများဆုံး ကစားသမားလည်း ဖြစ်နေပါတယ်။ ဒီလို နိုင်ငံတကာ အဆင့်မှာ ခြေစွမ်းပြနေ ပေမယ့် သူဟာ ဘရာဇီးလ် လက်ရွေးစင် အသင်းအတွက် အရွေးမခံရတာ (၁)နှစ် ကျော်နေပြီ ဖြစ်ပြီး ဒီနေ့ည အိုင်ယာလန်နဲ့ ခြေစမ်းပွဲ အတွက်လည်း ရွေးချယ်ခြင်း မခံခဲ့ရပါဘူး။ ဒါကြောင့် ရော်နယ်ဒင်ဟိုဟာ ကမ္ဘာ့ဖလား ပြိုင်ပွဲ လွဲချော်ဖို့ ရှိနေတယ်လို့ ကျွမ်းကျင်သူ တွေက သုံးသပ်နေကြ ပါတယ်။
Tuesday, March 23, 2010
Subscribe to:
Post Comments (Atom)
No comments:
Post a Comment