Mi hing te pen a khangto ding in a nunta ih hi aa, ih nuntak na ah khantoh na a om kei leh tua mihing pen a hehpih huai mahmah khat hi ki ci thei hi. Khantoh na nam tampi om aa, a sia lam khantohna leh a hoih lam in khantohna ci in nam nih in ki khen thei hi. Tua hi in ei pen bang ci dan lam tawh ih khangto hiam cih ih ngaih sut den ding thu pi mahmah hi.
Mi pawl khat te khantoh na pen a sia lam hi in tua in a mah leh a innkuanpih te a ding in thupha piang sak lo hi. Mihing khat pen a neu tung in a nu gilsung pan hong pusuak lai in bang mah tel nailo aa, a hih hang damdam in hong khang to in a mah a ki pattah zia tawh ki zui in hong khang to hi. Siat na lam ah a hi zong in hoihna lam ah a hi zong in kipat tatna om lo in a ma thu in ki hih thei mang lo aa, hong ki pattah na bang in ki kalsuan hi zaw hi. Zatep thei nai lo khat in Za hong tep na zong pen khantoh na mah in ki ciam teh aa, a hih hang tua khantohna hang in kua mah a lungdam lo uh hi. Tua bang mah in ih nuntakna ah thu hoih lo tawh ih gamtat ngei loh na te ih gamtat na pen khantoh na khat mah hi napi in tua pen mite'n hong lungdam pih leh hong pakta khol lo ding uh hi. Mi hon khat in a situi hong luang lawh ding aa, tua pen lungdam na situi hi lo in dahna, lauhna leh kihhuai sakna te hi zaw ding hi.
A hoih lam in khantoh na cih zong om leuleu aa, tua pen ih theih ngeinai loh pilna siamna te ih theih ih ngah, ih ngah nai loh zaa te ih ngah cih te hi aa, tua in mitampi phatuam sak in lung dam sak hi. Minam te a ding in thupha piang aa, mitampi tak lungdam na situi luang sak hi.
Khat vei lai in Dr. Vum Kho Hau kiangah Sizang makai honkhat va hawh uh aa, "Pu aw ei Siazang sung ah numei kizuak om ta hi ven" ci-in a ngen leh Dr. Vum Kho Hau in "tua a hih leh khangto mahmah ta hang ei ci-in na dawng kik hi. Hih thu ka ngaitsut ciang thu thuk kasa mahmah aa, zong pilvang huai ka sa mahmah hi. Tua hi aa, ih nuntakna ah kiim leh paam tawh ki nungta hi aa, tua kiim leh paam a ding a hoih khantohna bek hi lo in ei mau nuntak na a ding in a hoih khantoh na tawh ih khantoh theih ding thu pi mah mah ding in ka um hi.
Tua bang in a khangto thei ding in Pasian in lam hong hilh ding zong ngen ciat ding ki sam ding in ka um hi.
A khangto minam te ih hih na ding Topa'n thu pha hong pia ta hen...
TLCINPI (14.03.2010 Sunday)
No comments:
Post a Comment